الزمالك يبدأ وبقوة ..!!

بدأ الزمالك المباراة بهجوم قوي أسفر عن ركلة جزاء بسبب لمسة يد، ليتقدم المغربي أشرف بنشرقي للتنفيذ ويسجل أول أهداف الأبيض في الدقيقة 5.

وبعد عدة محاولات كاد الزمالك أن يسجل هدفه الثاني في الدقيقة 19 بعد عرضية من النقاز حولها أوباما بتسديدة رائعة علت العارضة بقليل.

وفي الدقيقة 29 ترجم الزمالك تفوقه الكاسح بهدف ثاني بعد تمريرة عرضية من الجهة اليسرى حولها أشرف بنشرقي باتجاه الشباك ليحولها مدافع ديكاداها في شباكه.

وسجل الفريق الصومالي هدفاً في الدقيقة 31 بعد عرضية تم تحويلها بتسديدة في الشباك، لكن الحكم ألغاه بداعي وجود تسلل على لاعب ديكاداها.

واختتم الزمالك الشوط الأول بالهدف الثالث بعد تمريرة عرضية داخل منطقة الجزاء من شيكابالا إلى عمر السعيد الذي سدد في الشباك الخالية من حارسها بسهولة في الدقيقة 45+1.

وأضاف الزمالك الهدف الرابع في الدقيقة 49 بعد عرضية جديدة من حمدي النقاز حولها المدافع حمدي الونش بيسراه إلى الشباك معلناً عن زيادة الرصيد التهديفي لفريقه. 

ومن تمريرة داخل منطقة الجزاء في الدقيقة 55 سدد بنشرقي كرة أرضية في منتصف المرمى تصدى لها الحارس قبل أن يرتبك ليضربها بقبضة يده إلى شباكه ليعلن عن هدف خامس للأبيض.

وفي الدقيقة 72 كاد البديل كريم بامبو أن يسجل أول أهدافه في مباراته الأولى بالقميص الأبيض لكن تسديدته من داخل منطقة الجزاء ذهبت بعيداً فوق عارضة الأبيض.

وأخطأ حارس ديكاداها مجدداً في التعامل مع الكرة ليهدي كريم بامبو هدفه الأول في الدقيقة 77 بعد تسديدة أرضية فشل الحارس في التعامل معها لتمر بسهولة إلى الشباك.

ونجح مصطفى محمد في استغلال الحالة السيئة لدفاع الفريق واهتزاز ثقة الحارس لينطلق في الدفاعات الصومالية بسهولة وينفرد ويسدد بيمناه إلى الشباك معلناً عن هدف سابع في الدقيقة 80.

ومرت الدقائق الأخيرة بهدوء بعد اقتناع لاعبي الزمالك بالاكتفاء بسبعة أهداف وعدم إرهاق أنفسهم بينما استسلم الفريق الصومالي تماماً ولم يحاول تسجيل هدف شرفي.

منة فضالي ... على الشط

قبل ما نبدأ كلامنا لازم تمامًا نكون مقتنعين إن فيه فرق كبير بين الحرية .. وبين الإبتذال .. وإن طبقة معينة في مصر تحاول إنها توهمنا إن التحضر معناه تقليل اللبس أو تعرية أجزاء معينة منه .. لكن حقول إن فكر بعض المصريين تحول للحرية الجسدية بطريقة تخلينا نخاف من بكرة ..

الحكاية

حكاية دلوقتي إن الفنانة .. منة فضالي .. قررت إنها تستمتع بالصيف في إسكندرية ... وفي الشاطئ قررت إنها تاخد كام صورة ليها علشان تنزلها للـ "فانز" بتوعها على الإنستجرام..

فصورت نفسها وهي قاعدة على كرسي على الشط .. ولابسه مايوه قطعتين .. ونشرت الصورة مع تعليق لطيف .. بمعنى "الأشخاص طيبوا القلب لا يؤذوا أي شخص .. ولكنهم يؤذون أنفسهم كثيرًا" بس بالإنجليزي طبعًا .. :D

بعد الصورة

الصورة طبعًا انتشرت جامد جدًا ... وناس كثير علقت على حلاوتها .. "الصورة" .. وناس تانية كثيرة برضه اعترضت وهاجمت الفنانة .. .

وكان واضح إن الهجوم كان شرس وشديد .. لدرجة إن الفنانة منة فضالي .. حذفت الصورة نهائيًا .. بس للأسف .. بعد ما انتشرت ووصلت لناس كثير وصحف ومواقع وصفحات تواصل .. وكله بيعيد نشرها وعامل حدوتة ..

تلخيص المشكلة

المشكلة إن الفنانات خاصة والفنانين عمومًا لازم يكونوا مدركين إنهم مش حكر على طبقة معينة من المعجبين أو المتابعين .. بالعكس .. دول لازم يكونوا متأكدين إن الناس اللي بتحبهم من الطبقة المتوسطة والفقيرة أكثر بكثير من الطبقة اللي فوق ..

ده غير إن الشعب بتاعنا حبوب بطبعه .. وبيحب قوي يقلد أي حد بيحبه .. فلما ألاقي بنتي بتطلب مني إني أجيبلها مايوه أو لبس زي فنانة معينة .. ويكون عريان بصراحة .. تخيلوا ردي حيكون إيه ؟؟ أكيد مش حقولها من عيوني يا بيبي ... ده أقل رد حيجبلها عاهة مستديمة :D

وهنا السؤال ....

هل كل شوية حنلاقي فنانة طالعة بطريقة معينة تثير ضجة في الشارع المصري والإنترنت ... مش كفاية بقى ولا إيه ؟؟

مباراة ليفربول وتشيلسي في كأس السوبر الأوروبي

يخوض فريق ليفربول الإنجليزى المحترف ضمن صفوفه النجم المصرى محمد صلاح، مواجهة من العيار الثقيل عندما يلتقى مع تشيلسى، على ملعب "فودافون أرينا"، بمدينة "إسطنبول" التركية، فى بطولة كأس السوبر الاوروبي.

وتقام مباراة ليفربول ضد تشيلسي في التاسعة مساء اليوم، الأربعاء، بتوقيت القاهرة، وستكون مذاعة على قناة beIN SPORTS HD 1.

يشارك الريدز في مباراة كأس السوبر الأوروبي بعدما توج بطلاً لمسابقة دوري ابطال اوروبا عقب فوزه على توتنهام بهدفين سجلهما النجم المصري محمد صلاح وأوريجي دون مقابل في المباراة النهائية التي جمعتهما بالعاصمة الإسبانية "مدريد" مطلع يونيو الماضي.

فى المقابل، حجز تشيلسي مقعده بعدما توج بطلاً لمسابقة الدوري الاوروبي "اليوروباليج"، بعد فوزه في المباراة النهائية على أرسنال بنتيجة 4 – 1، والتي جمعتهما بمدينة "باكو" عاصمة أذربيجان في مايو الماضي

ويسعى محمد صلاح لقيادة ليفربول نحو إعتلاء منصة التتويج من جديد، بعد خسارة بطولة "الدرع الخيرية" أمام مانشستر سيتي في الرابع من أغسطس الحالي في المباراة التي جمعتهما بملعب "ويمبلي".

ويدخل ليفربول مباراة اليوم وسط معنويات عالية بعدما حقق فوزاً عريضاً على نورويتش سيتي بنتيجة 4 – 1 في المباراة التي جمعتهما الجمعة الماضية بملعب "أنفيلد"، ضمن منافسات الجولة الاولى من عمر مسابقة الدوري الإنجليزي الممتاز "البريميرليج".

في المقابل يسعى تشيلسي لمصالحة جماهيره وذلك بالحصول على بطولة كأس السوبر الاوروبي، بعد الهزيمة القاسية التي تعرض لها في بداية مشواره بمسابقة الدوري الإنجليزي الممتاز "البريميرليج" أمام مانشستر يونايتد برباعية نظيفة الاحد الماضي.

بوست يقتل ويخرب ديار

الكلمة سلاح ذو حدين ... وللأسف من بعد ثورة 2011 .. والشعب المصري كله فقد الإحساس بقيمة الكلمة التي ينطقها .. أو يكتبها أون لاين ..

الناس أصبحت تبحث عن أي كلمة "تريند" لتجني منها المال الوفير والربح السريع .. ومش مهم نتيجة الكلمة اللي اتكتبت إيه .. ولا مهم مين حيزعل مين حيتضايق .. أو مين حيموت؟؟

وده اللي حصل بالظبط مع رجل بسيط .. لا يملك المال الوفير ولا السلطان الواسع .. كل مشكلته إنه قرر يصلي صلاة العيد وهو على راكب على عجلته .. كان خايف لو سابها جنبه تتسرق وميقدرش يقضي مصالحه ولا مصالح بيته أو يتحرك من مكان لمكان ..

الحكاية

الراجل ده .. قرر إنه يقف في صلاة العيد وهو راكب العجلة ... واتصادف مرور واحد قرر برضه إنه ميصليش العيد ..

قام اللي مبيصليش .. مصور الراجل اللي بيصلي على عجلته .. ونزلها على الإنترنت علشان يلم لايكات بصورة راجل قرر يلم حسنات ..

وبعد ما نزلت الصورة على الإنترنت .. انتشرت انتشار واسع .. ونالت السخرية من شباب الفيس بوك وانتقدوا الراجل اللي بيصلي .. ونسيوا يسألوا الشاب .. إزاي صور واحد بيصلي وقت الصلاة .. والمفترض إنه كان بيصلي هو كمان !!

ونقلا عن كلام الداعية المصري عبد الله رشدي، الخطيب بوزارة الأوقاف المصري، أن صلاة "رجل العجلة" صحيحة مائة بالمائة، وليس كما ادعى البعض بأنها باطلة، مبينًا أن من سخر من الرجل الكبير بالسن لا يعلمون أن صلاة العيد نافلة، وبالتالي يجوز للمسلم أن يُصلي جالسًا إما على كرسي أو دراجة، وله نصف الأجر.

وقال: هذا الرجل حصل على نصف الأجر، ومن يصلي قائمًا له الأجر كله، وما فعله هذا الرجل هو أنه أدى صلاة عيده جالسًا، وهذا ليس حرامًا، أو عيبًا، وكل ذلك لا يستدعي أن يتم السخرية والاستهزاء به، كما طالب بضرورة احترام الكبار، من قبل جيل الشباب الحالي.

واستند في كلامه إلى أن النبي محمد صلى الله عليه وسلم ، كان يُصلي السنن على دابته "الحمار أو البغل"، وعندما يريد صلاة الفريضة يصليها قيامًا، وهذا الأمر مُتفق عليه في المذاهب الأربعة.

المهم .. الصورة انتشرت .. ونزلت في أكتر من موقع وسوشيال ميديا .. وناس كتير اتكلمت

وهنا .. بدأ التأثير الفعلي لشر الكلمة ..

في يوم انتشار الصورة

الراجل فوجئ بتليفونات كتير عليه .. وبدل ما كانت تليفونات معايدة .. بقت تليفونات بمشاكل وانتقادات كتير ليه .. وهجوم من قرايب ومن الناس على السوشيال ميديا .. حتى إن الموضوع وصل لداخل بيوت بناته ..

فجأة .. الراجل لقى نفسه وسط صراع علشان يرد على منتقديه .. ويثبت صحة تفكيره وصحة اللي عمله (إن هو صلى لله) .. وهجوم شرس من مجتمع معظمه لا يؤدي حق الله في الكلمة .. لا الصلاة فقط ..

بنات الراجل متأكدين من صحة اللي عمله والدهم .. ووقفوا في وش منتقديهم ..

منهم واحدة .. اضطرت إنها تواجه زوجها ضد تريقته على والدها .. فوصل الموضوع إنها هجرت بيتها .. وراحت لبيت والدها .. مع أنباء عن طلاقها ..

وحاولوا البنات جاهدين إنهم يقنعوا المسئول عن صفحة "المحلة اليوم" إنه يحذف البوست أو ينزل إعتذار أو أي حاجة ترجع للراجل وقاره اللي اتهان .. أو جزء من كرامته اللي أصبحته مرمى نيران كل من له كيان ومالوش ... لكن دون جدوى .......

نتيجة نشر الصورة

طبقًا للبيانات المؤكدة .. الراجل الكبير .. تحت ضغط الهجوم العنيف من العيال الصغيرين .. تعرض لأزمة قلبية .. لإنه مستحملش الإهانة اللي بعد العمر ده كله اتعرضلها .. لمجرد إنه قرر يصلي

ولا استحمل المشاكل اللي حصلت مع بناته ... وأهل بيته .. نتيجة صلاته ..

وبعد ما دخل المستشفى .. انتشر خبر وفاته نتيجة الأزمة القلبية اللي اتعرض لها ...

ومن هنا .. ممكن نفصل الموضوع ببساطة ..

1-  راجل بسيط قرر يصلي .. وخاف على عجلته .. فصلى وهو راكب عليها.

2-  عيل قرر إنه ميصليش .. ويدور على حاجة تعمل تريند .. صور الراجل اللي بيصلي.

3-  الصورة تنتشر .. وتعمل تريند.

4-  مسئول صفحة "المحلة اليوم" يعمل بلوك لبنات الراجل علشان يحافظ على التريند.

5-  بنات الراجل يواجهوا مشاكل في بيوتهم .. مع خبر طلاق واحدة منهم.

6-  الراجل تجيله أزمة قلبية .. ويدخل بسببها المستشفى.

7-  خبر وفاة الراجل اللي صلى.

وهنا السؤال ....

هل يستحمل صاحب الصورة الأصلي وأول واحد حطها على السوشيال ميديا كمية الذنوب اللي اطحت عليه في مجرد 3 أيام ؟؟؟

هذا ما رأيت ..

يوم الخميس الموافق 24 / 11 / 2011 بميدان الممر بمدينة الإسماعيلية

من كتر التصريحات اللي كنت بسمعها على لسان "شهود عيان" وطبعاً كتروا هما اليومين دول .. قررت إني لازم أشوف بعيني علشان أعرف أتكلم ...

وعلشان إني أشوف بعيني .. معنى كده إني لازم أكون في قلب الحدث .. وعلشان كلامي يكون موثق .. كان لازم يكون معايا فيديو أو صورة تثبت كلامي ..

وعلشان كده .. قررت إني أنزل النهاردة ميدان الحرية (الممر سابقاً) بالإسماعيلية .. واللي خلال اليومين دول كان مصدر كلام وأخبار كتيييير ..

النهاردة .. كنت رايح أقابل واحد زميل لي قريب من الممر .. وانا عنده حكالي قصة شبيهة ببوست كان حطه زميل تاني لي على الفيس اسمه

.. Moamen Mohammed Abdelhameed ..

بالنسبة للبوست بتاع زميلي .. كان بيحكي عن الثورة اللي كانت عند مديرية امن بورسعيد بعد ما شوهد اثنان علي موتوسيكل و هما بيدفعوا متينات جنيه لبعض الي واقفين هنا تأكدت بما يدور من حولنا بدأوها كده للخراب بيشتموا ويلقوا الشماريخ علي مديرية الأمن وبعدين يقولوا سلمية !!!

طبعاً .. مش كتير منا حيصدق الحكاية دي .. طيب تعالوا بأه شوفوا الكلام بتاع صديقي اللي عند الممر .. قالي إيه ..

بيقولي إن زبون عنده .. ساكن في برج اللي فيه مكتب الخيول .. اللي في آخر إشارة في رضا .. قبل الممر على طول .. الراجل ده إمبارح كان واقف هو ومراته وولاده في البلكونة بيتابعوا اللي بيحصل في الممر .. وهم بيتفرجوا شافوا عربية ماركة نظيفة .. حمرا .. وقفت بعد الإشارة بشوية .. نزلت منها واحد ست أو بنت .. لافة حوالين جسمها كله علم مصر .. زي الملاية .. جالها ناس بموتسيكلات وعلى رجليهم .. وقفت اتكلمت معاهم شوية .. وشاورت على أماكن معينة عن الممر والشارع بتاع السكة الحديد واللي ناحية نادي الشجرة ونفق عبد الناصر .. وبعدين إديتهم حبة فلوس "حلوين" .. وركبت عربيتها ومشيت .. والناس مشيوا على المظاهرة .. وبدأوا يهتفوا ويحدفوا طوب .. !!

طبعاً .. بعد القصتين دول .. اللي للأسف ولا واحد فيهم قدر يوثق كلامه بصورة أو حتى فيديو .. كان لازم الواحد يشك برضه .. ليه .. لإن ما فيش دليل ... ما فيش إيه ؟؟ مافيش دليل ..

طيب .. علشان كده .. أنا قررت إني أنزل ميدان الممر .,.. !!!!!!

طبعاً .. فيه ناس ناو بتقول " بيقول إيه الواد ده ؟"

أيوة .. انا نزلت الممر .. :D .. مش كده وبس .. انا وصلت لحد الممر علشان أشوف بنفسي اللي بيحصل بالظبط وأحاول ألقط كام صورة للمواضيع اللي انا عاوزها علشان أقدر أتكلم ..

أول حاجة لاقيت شباب بتوع المستشفى الميداني .. ومكانها في الجنينة اللي قدام سوبر ماركت بينار .. وجنبها فيه عربيتين إسعاف .. واحدة حديثة .. والثانية البيضاء القديمة .. الحديثة كانت واقفة وفاضية من جوه .. واضح إنها مخصصة لنقل الحالات الحرجة للمستشفى .. والثانية البيضاء كان جواها أكياس مليانة علب .. طبعا ًواضح إنها أدوية وأدوات لزوم العلاج .. وكان في وسط الجنينة موجود بعض الدكاترة .. شباب طبعاً .. بنات وولاد .. غير كده . .كان فيه مجاميع شباب من الجنسين موجدين في الجنينة . عادي يعني .. ما هي برضه جنينة ... :D

المهم .. اتكلمت شوية مع سواق أو ممرض العربية البيضاء .. عرفت منه إن مافيش حاجة حصلت لسه .. أكيد الساعة كانت لسه مجتش 10 .. بس بيقول إمبارح يا باشا .. كان الوضع غير كده خاالص .. كان كل شوية ناس جاية مصابة .. وإن الإصابات كانت في كل حتة في الجسم .. وبيقولي عارف الواد اللي مات ده يا باشا .. ده كان متغربل رصاص .. في بطنه وفي صدره وفي رجله وفي واحدة دخلت من جنبه طلعت من الجنب الثاني .. أنا مش عارف بيعملوا في العيال الصغيرة كده ليه .. قلتله طيب بس انا سمعت إن فيه بلطجية .. قالي يابيه ..انا ابقى كداب لو قلتلك شفت . وسألته طبعاً عن الست اللي صاحبي قالي عليها .. قالي لا مشتفش حاجة زي كده .. شكرته .. ووعدته أذكره في كلامي على النت .. وكملت طريقي ..

وانا ماشي كانت العربيات ماشية عادي .. كإن ما فيش حاجة .. مع إني كنت سامع من سواق التاكسي اللي وصلني بعد المدرسة إن الشارع مقفول من عند الاستاد .. المهم .. وصلت لحد الإشارة .. وبصيت على البلكونات بتاعت عمارة الخيول دي .. علشان برضه أتأكد إن الراجل فعلاً يقدر يكشف المكان علشان ميكونش بينصب أو بيضحك على زميلي .. وفعلاً لاقيت إنه يقدر يكشف المكان من أي بلكونة ..

كملت شوية .. لاقيت إيه بأه .. لاقيت ناس كتيييير وشباب وبنات ورجالة .. وعيال صغيرة .. وشفت ولاد من المدرسة عندي .. الظريف .. إن أغلب الناس دي واقفين في الجنينتين بتوع ميدان الحرية .. "الممر سابقاً" مش حقولها تاني .. وعمالين يتفرجوا .. يشربوا بيبسي كانز .. بس محدش كان بياكل .. :D .. الظاهر إني جيت متأخر .. ولاقيت شباب واقفين عن اشارة الممر .. الإشارة اللي قبل الممر .. دول بأه أكيد الثوار .. قمت رايح ليهم .. أشوف إيه الوضع .. اتكلمت شوية مع الشباب علشان أعرف فاهمين ولا لأ .. لاقيتهم كلهم متضايقين من العيال اللي بتحدف طوب ..

أي ثورة فيها شباب وشيوخ .. وأكيد أطفال .. أمال مين اللي حيعمل بوليكة .. الأطفال هنا بأه .. المفروض إنهم معندهمش خبرة .. مافيش هدف .. بييجوا بس للتسلية .. لكن ... اللي شفته هناك .. غيرلي مفهومي تماماً .. وقلقني أكتر على مستقبل مصر .. ليه ؟؟؟

لإني وانا هناك لاقيت الشباب الموجودين في الممر واقفين وبيقولوا حد ينزل العيال اللي فوق علشان الموضوع مش مستاهل .. وبعدين إحنا جايين علشان نعبر عن رأينا مش علشان نضرب في بعض أو نكسر في البلد .. وبعدين مين دوول ؟

واحد رد عليه قاله دول عيال مش ليهم لزمة والله ... انا قلتلهم إيه .. يا جماعة طب ليه مش حد يروح ينزلهم من فوق بدل ما الموضوع يزيد ويتطور .. فواحد جه من ورانا وبيقولنا إنتوا فاكرين إن اللي فوق ده عيال . ؟؟ دول جيش .. قلتله يا عم جيش مين يا با .. الموضوع مش مستاهل كلام .. دول عيال صغيرة .. بس مش باينين علشان الضلمة .. قالي لأ يا باشا .. بص كده

لسه مكملش كلامه لاقينا ولاد من ناحيتنا حدفوا واحدة ملوتوف في السخان كده .. خبطت في عمود موجود جنب شريط القطر من فوق .. جنب الناس اللي بتحدف .. لاقيت إيه .. لاقيتهم عساكر جيش بلبس الجيش المموه !!!!!

العساكر بتوع الجيش .. واقفين فوق شريط القطر .. وبيحدفوا الشباب المتجمع عند الممر بالطوب والظلط بتاع القطر ... !!!

الجيش بيضرب في الشعب بالطوب والظلط ...

لسه مكملتش كلامي .. وشوفت اللي بيحدف طوب من فوق شريط القطر بتاع الممر .. لاقيت الجيش من الناحية الثانية بدأ يتحرك .. انا قمت مطلع الموبايل وصورت صورة وحيدة للعساكر اللي فوق الممر ... واخدت بعضي ومشيت .. وانا ماشي كنت عامل زي التايه .. مش عارف أفكر في إيه .. ومش عارف إيه اللي بيحصل ولا البلد رايحة على فين .. ولاقيت ناس ماسكين شباب عن محل هو وهي اللي في الطريق المودي على شبين من العمدة .. وتقريباً مسكوهم بيسرقوا حاجة .. بس طبعا علشان اللي شفته .. مقدرتش أقف شوية علشان أعرف الحكاية إيه .. وأخدت تاكس ومشيت ,,, ومن النهاردة .. حبدأ أنزل وأجيب الصور والفيديوهاات بتاعت اللي بيحصل في البلد .. ومن هنا ورايح .. مش حكتب غير اللي أشوفه بعيني وكاميرة موبايلي .. وبس .. ماليش مصدر تاني .. غير فيديوهاتي وصوري .. وفيديوهات أصدقائي المقربين والصور ..

والله على ما أقول شهيد .. لأن هذا .. ما رأيت !!